الشاعرة/نادية البسيونى
زى الحيط ———— جارتى مراة الأستاذ زيد قالت للسامعين طقيت واتجنيت من سبع البيت لما لقانى بلمحة عين جوة شوالى اتعبيت واتلونت بأحمر واخضر بص لوشى وقال عفريت عفرت حالى ولخبط بالى وزى العادة ساق المكر وساب لى البيت بخله يمد لسابع قلب وسابع جيب واستنيت مع نجمة ليل رابطة القمطة وحاسة بويل ولقيت عقرب ساعة الحيط يجرى بدقة قلبه بعيد دقة تودى ودقة تجيب فاكر نفسه فى ترانزيت واتمنيت لو دقة تصيب تعلن شعرة من التأنيب عدى الوقت وظنى يخيب نطيت جوة عيون الشيش زى الحارس فى التفتيش ألمح طيفه ولو تشويش والأحلام منتوفة الريش قايدة بنارى من التهميش قررت ابقى زى الحيط عامية وخارسة بدون تنهيد واللى يقول كان سوء تخطيط يصبح من غير رجل وإيد هااخلع قلبى واخلع راسى واحلف ع اللترين من جازى إنه مصاحب أخت نيازى الله يجازى حرمنى اسمع صوت إحساسى آه إحساسى بكداب ناسى ناسى يوم ما اتعلق بيا خلى عيونه تغمى عنيا اتغميت عن أحلى بنية كانت دايما تضحك فيا نفس ظروفى ظروف قدرية اتشعبطت ف عين سحرية ولقيت نفسى بحسن النية وسط هموم البيت ملهية بين تربية والتحقيق فى الرايحة وجاية عديت كل حدود الضيق زى اللقمة فى المرىء عايشة لوحدى فى الأبريق من غير كلمة تبل الريق …………………
